नेपाली क्रिकेट टोलीले उत्कृष्ट प्रदर्शनलाई निरन्तरता दिएसँगै मेरिलेबोन ४१ रनले पराजित

५ श्रावण, २०७३ /  नेपाली राष्ट्रिय क्रिकेट टोलीले उत्कृष्ट प्रदर्शनलाई निरन्तरता दिएसँगै मेरिलेबोन क्रिकेट क्लब एमसिसी माथि ४१ रनको जित हासिल गरेको छ।

टस जितेर ब्याटिङ गरेको नेपालले निर्धारित ५० ओभरमा ८ विकेट गुमाइ २ सय १७ रन बनाएको थियो। नेपालका स्पिनरहरूले उत्कृष्ट बलिङ गरेपछि २ सय १८ रनको लक्ष्य पछ्याएको एमसिसीले ४२।२ ओभरमा सबै विकेट गुमाएर १ सय ७६ रनमात्र जोड्न सकेको थियो ।

नेपालले इङ्ल्यान्ड भ्रमणलाई साउन २९ र ३१ मा नेदरल्यान्डविरुद्ध हुने विश्व क्रिकेट लिग च्याम्पियनसिपको तयारीका रूपमा लिएको छ । नेपाल–बेलायतबीचको दौत्यसम्बन्ध स्थापनाको दुई सय वर्षगाँठमा यो क्रिकेट भएको हो ।

एमसिसीका जिए एडैरले शतक प्रहार गरे पनि टोलीलाई जितको हकदार बनाउन सकेनन् । ओपनर एडैरले १ सय २३ बलमा ८ चौका र ३ छक्का प्रहार गर्दै १ सय रन बनाए । उनलाई वसन्त रेग्मीले राजु रिजालको हातबाट क्याचआउट गराए। अन्य ब्याट्सम्यानले नेपाली स्पिनरसामु खुलेर खेल्न सकेनन् । आइएम विल्किन्सलेले २० र एस क्लार्कले १६ रन बनाउनु बाहेक अन्य ब्याट्सम्यानले दोहोरो अंकमा रन बटुल्न सकेनन् । विल्किन्सनलाई सोमपाल कामीले बोल्ड गरे भने ओपनर क्लार्कशक्ति गौचनबाट बोल्ड हुन पुगे। बलिङ्गतर्फ वसन्त रेग्मी र सागर पुनले ३–३ , सोमपाल कामीले २ तथा सन्दिप लामिछाने र शक्ति गौचनले १–१ विकेट लिए । 

त्यसअघि टस जितेको नेपालले तेस्रो ओभरमै ओपनर अनिल मण्डललाई २ रनमा गुमाएको थियो । ४ बल खेलेका अनिल केपी डुचको बलमा कट एन्ड बोल्ड भएका थिए । त्यसपछि ब्याटिङ आएका शरद भेषावकरले पनि लामो इनिङ खेल्न सकेनन् । १३औं ओभरको पाँचौं बलमा शरद एस क्लार्कको बलमा बोल्ड भए । ४० बल खेलेका शरदले ५ चौका प्रहार गरे । पछिल्लो समय टोलीमा शरद लयमा देखिए । फिनिसरका रूमा खेल्ने शरदले नामिबियाविरुद्धको खेलपछि टोलीको इनिङ सम्हाल्ने जिम्मेवारी पाएका छन् । त्यसमा उनी सफलहुँदै आएका छन् ।

कप्तान पारस खड्का र उपकप्तान ज्ञानेन्द्र मल्लले नेपालको इनिङ सम्हाले । यिनीहरूले तेस्रो विकेटका लागि ४६ रनको साझेदारी गरेका थिए । २३औं ओभरको पहिलो बलमै ज्ञानेन्द्र केथ फिलिप डचको बलमा कट एन्ड बोल्ड भएका थिए । ६३ बल खेलेका उनले ५ चौकाको मद्धतमा ३९ रनको योगदान गरे ।लगत्तै पारस पनि पवेलियन फर्किए । २८ बलमा २ चौका र १ छक्का प्रहार गरेका पारस ३० रन बनाउँदा एमएस रनगोल्डको बलमा एस क्लार्कबाट समातिए। राजु रिजाल २४ रनमा आउट भए । ३५ बल खेलेका उनले २ चौका  प्रहार गरे। विनोद भण्डारी ९ रनमा आउट हुँदा सोमपाल ९२०० रनआउट भएका थिए । वसन्तले अविजित २४ रन बनाए । इङ्ल्यान्ड भ्रमणमा नेपालले यसअघि चार अभ्यास खेल खेलेको थियो । सबै खेलमा नेपाली टोली विजयी भएको थियो ।