आर्चरी खेल उदयपुरको गाईघाटमा सञ्चालन हुने

६ पुस,२०७३।  सातौं राष्ट्रिय खेलकुद प्रतियोगिता अन्तर्गत आर्चरी खेल उदयपुरको गाईघाटमा सञ्चालन हुने भएको छ । राष्ट्रिय आर्चरी खेल ब्यवस्थापन समितिले बुधबार पत्रकार सम्मेलन गरेर आगामी ९ देखि ११ गतेसम्म सञ्चालन गर्ने गरी खेल तालिका सार्वजनिक गरेको हो । 

ब्यवस्थापन समितिका संयोजक किरण राईले आर्चरी खेल तीन विधामा सञ्चालन गरिने जानकारी दिनुभयो । प्रतियोगिताका लागि देशभरबाट २५ जना महिला र ६५ जना पुरुष खेलाडीको सहभागिता रहने र एक डाइरेकटरसहित २० जना प्राविधिक परिचालन हुने संयोजक राईले बताउनुभयो । संयोजक राईले भन्नुभयो ‘उदयपुरको निम्ति यो सुनौलो अवसर रहेको भन्दै सफल बनाउन सबैले आआफ्नो ठाउँबाट सहयोग गर्न आवश्यक रहेको छ ।’  

सदरमुकाम गाईघाटस्थित थारुहट रंगशालामा सञ्चालन हुने प्रतियोगितामा रिकर्व ओपन, कम्पाउन्ड आर्चरी र स्ट्याण्डर्ड आर्चरी जुनियर गरी तीन विधा रहनेछ ।