श्रीलंका विरुद्धको तीन टेष्ट म्याचको श्रृंखला साउथ अफ्रिकालाई

दोस्रो टेष्टमा पाहुना टोली श्रीलंकालाई २ सय ८२ रनले पराजित गर्दै साउथ अफ्रिकाले तीन टेष्ट म्याचको श्रृंखला एक खेल अगावै जितेको छ ।

जितका लागी ५ सय ७ रनको विशाल लक्ष्य पच्छ्याएको पाहुना टोली ६२ ओभरमा २ सय २४ रनमै समेटिएपछि घरेलु टोली विजयी भएको हो । श्रीलंकाका लागी कप्तान एंगेलो म्याथ्युजले ४९ , रंगना हेराथले अविजित ३५ , दिनेश चण्डिमालले ३० र कौशल शिल्भाले २९ रन जोड्न बाहेक अन्यले खासै राम्रो प्रदर्शन गर्न सकेनन् । श्रीलंका यसअघि पहिलो इनिङ्गमा एक सय १० रनमा समेटिएको थियो ।

उता केपटाउनमा टस हारेर ब्याटिङ्ग गरेको घरेलु टोलीले भने पहिलो इनिङ्गमा ओपनर डिन एल्गरको एक सय २९ , क्विन्टोन डे कोकको एक सय एक र कप्तान फाप डु प्लेसिसको ३८ रनको मद्दतमा एक सय १६ ओभरमा ३ सय ९२ रन बनाएको थियो भने दोस्रो इनिङ्गमा ५१ दशमलव ५ ओभरमा ७ विकेटको क्ष्यतिमा २ सय २४ रन बनाउँदा इनिङ्ग समाप्तिको घोषणा गरेको थियो ।

खेलको म्यान अफ दि म्याच विजयी टिमका कागिसो रवाडा भए । उनले श्रीलंकाका ६ ब्याट्समेनलाई पेवेलियनको बाटो देखाएका थिए ।

२२ पुस, २०७३