बार्सिलोना कोपा डेल रे फुटबलको अन्तिम १६ मा

६ पुस,२०७३।    स्पेनिस क्लब बार्सिलोनाले कोपा डेल रे फुटबलको अन्तिम १६ मा आफ्नो स्थान पक्का गरेको छ । दोस्रो लेग अन्तर्गत आज राति भएको खेलमा बार्सिलोना हर्कुलिसलाई ७–० ले हराउँदै समग्रमा ८–१ को जितसहित अन्तिम १६ मा पुगेको हो । पहिलो लेगमा १–१ को बराबरीमा रोकिएको बार्सिलोनालाई घरेलु मैदानमा भएको दोस्रो लेगमा शानदार जित दिलाउने क्रममा आर्ड तुरानले ह्याट्रिक गरे । 

स्टार खेलाडी लियोनल मेस्सी, लुइस स्वारेज र नेइमार बिना खेलेको बार्सिलोनाका लागि लुकास डिग्ने, इभान रेकिटिक, राफिन्हा र पाको एकेसरले एक एक गोल गरे ।  यस्तै राति नै भएको खेलमा फोर्मेनटिरालाई ९–१ ले हराएको सेभिल्ला समग्रमा १४–२ को जितसहित अन्तिम १६ मा पुगेको छ । यस्तै लेगानेसलाई २–१ ले हराएको भ्यालेन्सिया समग्रमा ५–२ तथा ग्रनाडालाई २–० ले हराएको ओसासुना समग्रमा २–१ को जितसहित अन्तिम १६ मा पुगेको छ । स्पोर्टिङ गिजोनलाई दोस्रो लेगमा ३–१ ले हराएको एइबर समग्रमा ५–२ तथा रियल बेटिसलाई ३–१ ले हराएको डिप्रोटिभो ला कोरुना समग्रमा ३–२ को जितसहित अन्तिम १६ मा पुगेका छन् ।